Lasartetik Zubietako Erraustegira Martxa, apirilaren 29an
Errausketaren Aurkako Mugimendutik –Donostia Bizirik, Eguzki eta
Ekologistak Martxan elkarteek babestuta– dei egiten diegu herritarrei
apirilaren 29an Lasartetik abiatu eta Zubietan eraikitako Erraustegiraino
oinezko martxa batean parte hartzera, agintariei esijitzeko geldi dezatela
erraustegia, ez dezatela gehiago hondakinik erre, ez Zubietan, ez Añorgan,
ez Bergaran eta ez inon.
Aurtengoa izango da Lasartetik martxa egiten den hirugarren urtea.
Iazkoaren leloa honakoa izan zen: “ERRAUSTEGIAZ… ZER EZ DIGUTE
ESATEN?”. Bada, geroztik erraustegiaren arduradun eta propagandistek
erealitatea ukatzen jarraitu duten arren, azken hilabeteotan argitara ateratzen
joan dira ezkutatutako egia deseroso batzuk. Horregatik, aurtengo martxaren
leloa “ERRAUSTEGIA AIREA, URA ETA LURRA KUTSATZEN” izango
da. Izan ere, horixe ari da gero eta ageriagoan gelditzen, erraustegia oso
modu nabarmenean kutsatzen ari dela.
Horra hor erraustegiaren azpian pasatzen den Arkaitzerreka. GHK–k,
plantaren jabeak, kutsadura behin eta berriz ukatu duen arren, azkenean
Ekondakin enpresari, erraustegiaren kudeatzaileari, espedientea ireki dio…
Arkaitzerreka kutsatzeagatik.
Halaber, Herbehereetako ToxicoWatch fundazioak egindako azterketen
arabera, erraustegiak aire, lurzoru, ur eta landareak dioxinaz eta bestelako
gai toxikoz kutsatzen ditu. GHK–k ukatu du, ohi duen bezala, baina
kontsortzioak berak urtero Jaurlaritzari aurkeztu beharreko Ingurumen
Zaintzako Programaren barruan IDOM eta SGS konpainiek egindako
azterketetan kutsadura aurkitu dute.
Eta Unibertsitateko irakaslez osatutako Ekopol elkarteak txosten tekniko
batean azaldu duenez, erraustegiak bi mila aldiz gainditu zuen gehienezko
kutsadura–muga 2020an.
Hori guztia gutxi balitz, Arantxa Tapia Azpiegituretako sailburuak
Legebiltzarrean aitortu du erraustegiak ez dituela betetzen Jaurlaritzak
ezarritako baldintza guztiak.
Horixe da apirilaren 29ko martxarekin salatu nahi dugun panorama itsusia.
GHK–k eta Aldundiak, ukazioaz eta propagandaz, beti diru publikoa lagun,
erraustegiaren errealitate kutsatzailea ezkutatzeko pareta bat eraiki dute.
Baina pareta horretan arrakalak gero eta ugariago dira. Lagundu iezaguzu
nabarmenak egiten. Parte hartu apirilaren 29ko martxan.